2025 жылғы 30 қыркүйегінде Запорожье ауылдық модельді кітапханасында «Қарттарын қадірлеген – ел ардақты» атты үлкенге құрмет көрсетуге арналған әсерлі кездесу өтті.

Іс-шараға өмірлік тәжірибесі мен даналығы жас ұрпақ үшін баға жетпес қазына болып саналатын әжелер шақырылды. Кездесу барысында жылулық, ықылас пен шынайы сезімдер үстем болды. Кітапхананың жас оқырмандары қонақтарға өздерінің сүйіспеншілігі мен қамқорлығын білдірген символикалық сыйлықтар – ашықхаттар дайындады. Кездесудің ерекше сәтіне айналған «Алғыс ағашында» балалар үлкендерге арнап жүрекжарды тілектерін жазып қалдырды. Әжелер сол жазбаларды оқып, балалардың шынайы ықыласына ризашылықтарын білдіріп, көңілдері толқыды. Мереке әрі қарай көңілді флешмобпен – ұйымдастырушылар мен әжелердің бірге билеген биімен жалғасын тапты. Бұл бәріне қуаныш сыйлап, көңіл-күйді көтерді. Кездесудің соңында әжелер мен балалар дастарқан басында әңгіме-дүкен құрып, үлкендер жастық шақтағы естеліктерімен, өмірлік қызықты оқиғаларымен бөлісті.Іс-шараның мақсаты – жас ұрпаққа үлкенді құрметтеуді үйрету, отбасылық және ұрпақтар сабақтастығының құндылығын қалыптастыру, өзара түсіністік, мейірім мен алғыс сезімдерін дәріптеу болды. Осылайша, «Қарттарын қадірлеген – ел ардақты» кездесуін тек мерекелік шара деп қана емес, әр буынды жақындастырған, рухани құндылық пен адамгершілікке тәрбиелейтін шынайы сабақ деп бағалауға болады.